Un buscador de setas consulta el móvil en un mirador sobre bosques en otoño

Guía rápida

Como se usa micomapa

Todo o que podes facer co mapa, en cinco minutos. E o que podes esperar del, sen letra miúda.

1 Escolle o teu cogomelo e mira onde se move

Arriba á esquerda escolles a especie. O mapa pinta as próximas dúas semanas zona a zona: gris cando o monte dorme, amarelo cando comeza a moverse, vermello cando é o momento.

  • Un mapa de calor. A cor fúndese dunha zona a outra e amosa dunha ollada por onde vai a saída.
  • Mapa, relevo ou satélite. O relevo deixa ver as ladeiras de sombra e os vales. O satélite, o monte de verdade.

2 Move o día

Movendo a barra, ou coas frechas do teclado, percorres os próximos quince días. Se unha comarca se vai acendendo día a día, a saída estase a preparar: ese é o aviso que buscas. Se se apaga, ou chegaches tarde ou vén frío.

Os primeiros días son os máis seguros. Máis adiante, fíxate na tendencia máis ca no número exacto.

3 Preme nunha zona

Ábrese a súa ficha, con todo o que necesitas para decidir se vas:

  • o veredicto do día e cal será o seu mellor día;
  • a curva das dúas semanas, para ver se sobe ou baixa;
  • que lle falta ou que lle sobra: se choveu abondo, se a terra garda a humidade, se fai demasiado frío ou demasiada calor;
  • se houbo achados por alí antes, e en que época do ano;
  • a vila máis próxima, para orientarte.

No móbil, para que o mapa non quede tapado, vai por pasos: se estás lonxe, o primeiro toque achégate; xa de preto, cada toque amósache un resumo dunha liña enriba do panel, coa puntuación e a vila, e con Ver abres a ficha completa.

4 Busca a túa vila

No ordenador, escribe o nome dunha vila no buscador. No móbil, ou se xa estás no monte, preme Onde estou: o mapa lévate á túa zona e amósache como está. Se o teu móbil sabe exactamente onde estás, un punto azul márcao.

5 Le o parte da fin de semana

Cada semana publicamos o parte micolóxico: onde paga a pena ir o sábado e o domingo, e tamén nas pontes, especie a especie e provincia a provincia.

6 Coñece cada cogomelo

Cada especie ten a súa ficha: cando sae, en que bosques, que necesita para saír, como recoñecela e onde está a punto esta semana en cada provincia. Comeza polo níscaro ou pola andoa.

7 Lévao no móbil

micomapa instálase como unha aplicación, sen tenda e sen rexistrarte. Ábrese directamente no mapa. Se queres ver máis mapa, prega o panel de abaixo coa asa de arriba: queda nunha liña co cogomelo e o día.

  • iPhone: en Safari, botón Compartir e Engadir á pantalla de inicio.
  • Android: en Chrome, menú ⋮ e Instalar aplicación.

8 Pregúntalle ao teu asistente

Se usas un asistente virtual, pregúntalle: «Haberá níscaros en Lalín a semana que vén?». Pode ler a nosa previsión directamente, sen que teñas que instalar nada.

Que podes esperar

Unha previsión nova cada mañá
Co tempo máis recente de cada zona.
Máis fiable canto máis preto
Os días máis próximos apóianse sobre todo na chuvia que xa caeu; os últimos, na previsión. Fíate da tendencia.
Comarcas, non recunchos
Falamos de zonas duns cinco quilómetros. Dentro manda o que sabes do terreo: a ladeira de sombra, a clareira, o piñeiro vello.
Condicións, non garantías
Un vermello quere dicir que o tempo se parece ao das semanas que preceden unha boa saída. Se alguén pasou antes ca ti, iso non o sabe ninguén.
O gris tamén informa
Se o teu cogomelo está en gris, o monte non está a punto. Aforras a viaxe.
Comprobado con achados reais
Contrastamos a previsión con milleiros de achados de tempadas pasadas e corrixímola onde fallaba. Unhas especies déixanse anticipar mellor ca outras, e seguimos afinando cada tempada.
O teu ollo decide
Non identificamos cogomelos. Se dubidas, non o apañes. Máis nos avisos.

As cores do mapa

  • Durmido · Aínda non
  • Baixo · Comeza a moverse
  • Medio · Pode haber algo
  • Alto · Bo momento
  • Moi alto · É o momento

Abre o mapa Como o sabemos